काठमाडौं: विश्व फुटबलको सबैभन्दा ठूलो महोत्सव विश्वकप २०२६ मा चार राष्ट्रले पहिलो पटक सहभागिता जनाउँदैछन्।

केप भर्डे, कुराकाओ, जोर्डन र उज्बेकिस्तानले यस संस्करणमार्फत विश्वकपमा डेब्यू गर्न लागेका हुन्।

विश्वकपमा पहिलो पटक खेल्ने टोलीहरूले विगतमा पनि ठूला राष्ट्रहरूलाई स्तब्ध पार्दै अविस्मरणीय इतिहास रचेका छन्।

सन् २०१० मा दक्षिण अफ्रिकामा आयोजित विश्वकपमा डेब्यू गरेको स्लोभाकियाले तत्कालीन साविक विजेता इटालीलाई ३–२ ले पराजित गर्दै नकआउट चरणमा स्थान बनाएको थियो। उक्त नतिजा विश्वकप इतिहासकै ठूलो उलटफेरमध्ये एक मानिन्छ।

यस्तै, २०१४ मा बोस्निया–हर्जगोभिनाले इरानमाथि ऐतिहासिक जित निकालेको थियो भने २०१८ र २०२२ का डेब्युटेन्ट टोलीहरू पानामा, आइसल्याण्ड र कतारले पनि विश्वकपमा अंक बटुल्न सफल भएका थिए।

यसपटक विश्वकपको ढाँचा विस्तार भएसँगै ४८ टोली सहभागी हुँदैछन्, जसमध्ये ३२ टोली नकआउट चरणमा प्रवेश गर्नेछन्। त्यसैले नयाँ टोलीहरूका लागि इतिहास रच्ने अवसर अझ बढी देखिएको छ।
विश्वकपमा यति धेरै नयाँ टोली २००६ पछि पहिलो पटक देखिएका हुन्। जर्मनीमा आयोजित २००६ को विश्वकपमा सात राष्ट्रले पहिलो पटक सहभागिता जनाएका थिए। त्यसमध्ये घाना अन्तिम १६ मा पुग्न सफल भएको थियो।

विश्वकप इतिहास हेर्दा डेब्यु टोलीहरूको प्रदर्शन धेरै पटक प्रभावशाली देखिएको छ। १९६६ मा उत्तर कोरिया र पोर्चुगल क्वार्टरफाइनलसम्म पुगेका थिए। १९९० मा कोस्टारिका अन्तिम १६ मा पुग्दा आयरल्याण्ड क्वार्टरफाइनलमा पुगेको थियो।

त्यस्तै, १९९४ मा साउदी अरेबिया र नाइजेरिया दुवै अन्तिम १६ मा प्रवेश गरेका थिए। १९५८ को विश्वकपलाई त डेब्यु टोलीहरूको सबैभन्दा सफल संस्करण मानिन्छ, जहाँ उत्तरी आयरल्याण्ड, सोभियत संघ र वेल्स तीनै टोली क्वार्टरफाइनल पुगेका थिए।
यस संस्करणमा उज्बेकिस्तान समूह ‘के’ मा परेको छ, जहाँ उसका प्रतिद्वन्द्वी पोर्चुगल, कङ्गो र कोलम्बिया छन्। मध्य एसियाली राष्ट्र उज्बेकिस्तानले पहिलो सहभागितामै नकआउट चरण पुग्ने लक्ष्य राखेको छ।
कुराकाओ समूह ‘ई’ मा छ। जर्मनी, इक्वेडर र आइभरी कोस्ट रहेको यो समूह चुनौतीपूर्ण मानिएको छ।

सानो जनसंख्या भएको राष्ट्र कुराकाओले चार पटकको विश्व विजेता जर्मनीविरुद्धको खेलबाट आफ्नो अभियान सुरु गर्दैछ। जर्मनीलाई पराजित गर्न सके कुराकाओले विश्वकप इतिहासकै ठूलो सनसनी मच्चाउन सक्छ।

जोर्डन समूह ‘जे’ मा साविक विजेता अर्जेन्टिना, अल्जेरिया र अस्ट्रियासँग प्रतिस्पर्धा गर्दैछ। टोलीका कप्तान मुसा अल–तामारी जोर्डनका सबैभन्दा चर्चित फुटबलरमध्ये एक हुन्। फ्रान्सेली क्लब रेनेसबाट खेल्ने उनी युरोपका शीर्ष पाँच लिगमध्ये कुनै एकमा खेल्ने पहिलो जोर्डनियन खेलाडीका रूपमा परिचित छन्।

अर्कोतर्फ, केप भर्डे समूह ‘एच’ मा स्पेन, उरुग्वे र साउदी अरेबियासँग रहेको छ। कप्तान रायन मेन्डेस टोलीका सर्वाधिक खेल खेल्ने र सर्वाधिक गोल गर्ने खेलाडी हुन्। अनुभवी कप्तानको नेतृत्वमा केप भर्डेले पनि विश्वकपमा स्मरणीय छाप छोड्ने अपेक्षा गरिएको छ।

विश्वकपको इतिहासले नयाँ टोलीहरूलाई कहिल्यै कमजोर नठान्नुपर्ने सन्देश दिएको छ। अब हेर्न बाँकी छ, के २०२६ का यी चार नयाँ टोलीले पनि विगतका डेब्युटेन्ट राष्ट्रहरूले जस्तै फुटबल जगतलाई चकित पार्नेछन् ?