आप्रवासी बोकेका दुई वटा अमेरिकी सैन्य जहाजलाई फिर्ता पठाइदिएपछि अमेरिकी राष्ट्रपति डोनाल्ड ट्रम्प कोलम्बियाप्रति रुष्ट बनेका छन् ।

राष्ट्रपति ट्रम्पले कोलम्बियाबाट आयात हुने सम्पूर्ण वस्तुमा २५ प्रतिशत कर लगाउने घोषणा नै गरेका छन् । अमेरिकाले कोलम्बियाका सरकारी अधिकारीमाथि पनि भिसा प्रतिबन्ध लगाउने घोषणा गरेको छ । जवाफमा कोलम्बियाका राष्ट्रपति गुस्तावो पेट्रोले पनि अमेरिकाबाट आयात हुने वस्तुमा २५ प्रतिशत कर लगाउने घोषणा गरेका छन् ।

आप्रवासी अपराधी नभएको जिकिर गर्दै पेट्रोले सैन्य विमानमार्फत् उनीहरुलाई पठाउन नहुने भन्दै उक्त विमानलाई फिर्ता पठाउन निर्देशन दिएका थिए । लगत्तै अमेरिकी राष्ट्रपति ट्रम्पले तत्काल निर्णायक प्रतिशोधात्मक उपाय घोषणा गर्दै कोलम्बियाली सरकारी अधिकारी, सहयोगी र समर्थकमाथि यात्रा प्रतिबन्धदेखि भिसा खारेजसम्मका घोषणा गरेका हुन् ।

कोलम्बियामा १५ हजारभन्दा बढी अमेरिकी नागरिक अवैध रुपमा बसोबास गर्दै आएको तर आफ्नो सरकारले उनीहरुलाई फिर्ता नपठाउने पेट्रोको भनाइ छ ।